Bluomen und daz gruene gras
Bluomen und daz gruene gras
beidiu sint verswunden
nu treit uns aber diu linde vur die sunne nindert schat;
ê, dô sî geloubet was,
dô hiet man dâ vunden
vil maneger hande vreuden: dâne gêt nu nindert phat,
dâ wir dô
ie sô vrô
bî ein ander wâren.
diu vreude het ein ende, dô diu zît begunde swâren;
des trûret manic herze, des gemuete stuont ê hô.
Rôsen ist diu heide blôz
von des rîfen twange.
diu vogelîn in dem walde habent nindert obedach.
winder, din unstaetic lôz
twinget uns ze lange
von dir und einem wîbe lîde ich leider ungemach,
der ich gar
mîniu jâr
hân gedienet lange
von herzen williclîchen, eteswenne mit gesange.
des ist mir niht gelônet noch, wie kleine ist umbe ein hâr.
Man sol willetôre sîn
aller guoten wîbe,
und in ir willen hengen, der ir hulde welle haben:
daz ist der geloube mîn,
swie sô mir mîn schîbe
ze wunsche niht enloufe ich waene, ich werde alsô begraben
dazs ir muot
mir ze guot
gein mir iht verkêre.
diu schult diu lît ûf Watken unde ûf jenem Ôtegêre,
daz sî nu alsô dicke mir sô toubez ôre tuot.
Geuden giengen sî gelîch
hiwer an einem tanze:
dâ muosten drîe vor im gîgen, und der vierde pheif.
sîner vreuden was er rîch
under sinem kranze.
er nam im, da diu schoene gie, vil manegen umbesweif
Erkenvrit
allez mit
vaste an sînem diehe;
er wunschte, daz er mir an ir daz helmel vor geziehe.
er hât den vuoz verlenket hiwer an einem geilen trit.
Dienest âne saelikeit
niemen kan volenden.
ich hân ez rehte ervunden: kleiner lôn ist mir beschert.
mîn verloren arebeit
wil mich dicke phenden
an vreuden: ungelucke maneger saelden mich behert.
ich verzage,
daz mîn klage
niht ir herze entsliuzet
und daz er gegen ir in rûnewarten bolzel schiuzet,
sich guffent, daz er mich ze jungist von ir dienste jage.
Swer versmachet mînen sanc
und sîn spottelachet,
wol singen unde rûnen habent ungelîchen lôn
ê, do’r in diu ôren klanc,
was er ungeswachet.
nu klinget er ûf zwîvel, niene ûf rehten lobes dôn.
minne riet,
daz ich liet
nach ir hulden sunge.
daz tet ich unde wânt des niht, daz mir dâ misselunge
nu laet mir niht gelingen ein vil hiuziu dorperdiet.
(1 votes, average: 5,00 out of 5)