Українська та зарубіжна поезія

Вірші на українській мові





Frout iuch

I

Frout iuch, junge und alte!
der meie mit gewalte

den winder hât verdrungen,
die bluomen sint entsprungen.

wie schôn diu nahtegal
ûf dem rîse
ir sueze wîse
singet, wunneclîchen schal!

II

“Walt nu schône loubet.
mîn muoter niht geloubet.

der joch mit einem seile”,
sô sprach ein maget geile,

“mir bunde einen fuoz,
mit den kinden
zuo der linden
ûf den anger ich doch muoz.”

III

Daz gehôrte ir muoter:
“jâ swinge ich dir daz fuoter

mit stecken umbe den rugge,
vil kleine grasemugge.

wâ wilt dû hupfen hin
ab dem neste?
sitze und beste
mir den ermel wider in!”

IV

“Muoter, mit dem stecken
sol man die runzen recken

den alten als eim sumber.
noch hiuwer sît ir tumber,

dan ir von sprunge vart.
ir sît tôt
vil kleiner nôt,
ist iu der ermel abe gezart.”

V

Ûf spranc sî vil snelle.
“der tievel ûz dir belle!

ich wil mich dîn verzîhen;
dû wilt vil ubel gedîhen.”

“muoter, ich lebe iedoch,
swie iu troume.
bî dem soume
durch den ermel gât daz loch.”

1 Star2 Stars3 Stars4 Stars5 Stars (2 votes, average: 3,00 out of 5)

Frout iuch - NEIDHART VON REUENTAL