Reichston
Ich saz ûf eime steine
und dahte bein mit beine,
dar ûf satzte ich den ellenbogen;
ich hete in mîne hant gesmogen
mîn kinne und ein mîn wange.
Dô dâhte ich mir vil ange,
wie man zer werlte solte leben:
Deheinen rât kond ich gegeben,
wie man driu dinc erwurbe,
der keinez niht verdurbe.
Diu zwei sind êre und varnde guot,
daz dicke ein ander schaden tuot;
das dritte ist gotes hulde,
der zweier ubergulde.
Die wolte ich gerne in einen schrîn.
Jâ leider, des enmac niht sîn,
daz daz guot und werltlîch êre
und gotes hulde mêre
zesamen in ein herze komen.
Stîge unde wege sint in benomen:
untriuwe ist in der sâze,
gewalt vert ûf der strâze,
fride unde reht sint sêre wunt.
Diu driu enhabent geleites niht, diu zwei enwerden ê gesunt.
Ich hôrte diu wazzer diezen
und sach die vische fliezen;
ich sach, swaz in der werlte was,
walt, velt, loup, rôr unde gras.
Swaz fliuzet oder fliuget
oder bein zer erde biuget,
daz sach ich, unde sage iu daz:
deheinez lebet âne haz.
Daz wilt und daz gewurme,
die strîtent starke sturme,
alsô tuont die vogele under in,
wan daz si habent einen sin:
si wæren anders ze nihte,
si schuefen starc gerihte.
Si kiesent kunege unde reht,
si setzent herren unde kneht.
Sô wê dir, tiuschiu zunge,
wie stât dîn ordenunge,
daz nû diu mugge ir kunec hât,
und daz dîn êre alsô zergât!
Bekêrâ dich, bekêre!
Die zirkel sint ze hêre,
die armen kunege dringent dich.
Philippe, setze den weisen ûf, und heiz si treten hinder sich.
Ich sach mit mînen ougen
man und wîbe tougen,
dâ ich gehôrte und gesach,
swaz iemen tet, swaz ieman sprach.
Ze Rôme hôrte ich liegen
und zwêne kunege triegen.
Dâ von huop sich der meiste strît,
der ê wart oder iemer sît,
dô sich begunden zweien
pfaffen unde leien.
Dâ was ein nôt vor aller nôt:
lîp unde sêle lac dâ tôt.
Die pfaffen striten sêre,
doch wart der leien mêre.
Diu swert, diu leiten si dernider;
si griffen zuo der stôle wider:
si bienen, die si wolten,
und niht den si solten.
Dô stôrte man diu goteshûs.
Dô hôrte ich verre in einer klûs
vil michel ungebære:
dâ weinte ein klôsenære,
er klagete gote sîniu leit:
“Ôwê, der bâbest ist ze junc: hilf, herre, dîner kristenheit.”
(2 votes, average: 4,50 out of 5)