Українська та зарубіжна поезія

Вірші на українській мові



Schouwet ûf den anger

1 Schouwet ûf den anger:
winter wert niht langer;
kleine vogel twanger.
diu heide ist worden swanger:
5 si birt uns rôsen rôt.
man hoert vogel singen,
man siht bluomen springen,
dur daz gras ûf dringen;
ir swaere wil sich ringen
10 als in diu zît gebôt.
alsus enpfâhen wir den suezen meien!
wol ûf, ir hubschen leien!
wir suln die froide heien,
vil froelîch tanzen reien.
15 ahî, solt ich mich zweien
mit ir diu mir mac wenden sende nôt.
2 Lât mir sorgen swinden,
lât mich foide vinden,
lât den kriec erwinden;
ir sult iuch underwinden
5 mîns herzen, saelic wîp.
frouwe, ir sult mir mêren
froide, leit verkêren,
hôchgemuete lêren.
frou Minne, bit die hêren
10 daz mich ir kiuscher lîp
getroeste: nûst si doch mîn kuniginne.
vil minnenclîchiu Minne,
getroeste mîne sinne,
sît ich nâch liebe brinne.
15 ob ich den trôst gewinne,
der tac mir mac wol heizen leitvertrîp.
3 Wer kan trûren swachen?
wer kan froide machen
mit vil lieben sachen?
wer kan lieplîche lachen?
5 ir mundes rôter schîn.
wer kan trûren wenden?
wer kan sorge swenden,
sende nôt volenden?
wer kan helfe senden?
10 diu liebe frouwe mîn,
diu mich ir hât von kinde her gebunden.
si kan mîn herze wunden.
daz hân ich wol befunden
daz ich bin uberwunden
15 nu unde zallen stunden.
si sol mir wol dur reht genaedic sîn.
4 Wer kan leit vertrîben?
wer kan frô belîben?
nieman wan bî wîben.
des wol ir suezen lîben!
5 si sint fur trûren guot:
als des meien bluete
froit ir wîplîch guete:
sie gent hôchgemuete.
daz got ir lîp behuete,
10 doch mir ir einiu tuot
vil selten liep, die ich mit triuwen meine.
diu sueze und diu vil reine
der helfe ist gein mir kleine,
der ich von kindes beine
15 gedienet hân aleine,
daz sie noch nie getrôste mir den muot.
5 Ach wan solte ich schouwen
liep mîns herzen frouwen!
in den gruenen ouwen,
in luft und ouch in touwen
5 wart lieberz nie gesehen
daz sô lieplîch waere
guot fur sende swaere,
sam diu seldebaere.
wie wol ich daz bewaere,
10 kund ich ze rehte spehen!
ir munt, ir kel und ouch ir liehten wangen
diu hânt mich ir gevangen.
nâch ir muoz mich belangen.
het ich den trôst enpfangen,
15 sô waer mîn leit zergangen.
ich hân noch wân daz mir wil liep beschehen.


Schouwet ûf den anger - GOTTFRIED VON NEIFEN