Nieman volloben frouwen kan
Nieman volloben frouwen kan,
wan sî bî tugenden wonent alse schône:
saelden krône sint ir ingesinde.
Wol in, wol iemer, des wunsch ich.
5 mich sol wol des muot zîhen in gemuete,
dicke ir guete ich sô wol bevinde.
Ein schoenez wîp, ein wîplîch lîp:
diu sueze guete manc gemuete
sô suoz durgât, sô
10 daz er frô muoz sîn der wunnen,
die dem liechten sunnen glîchent sich:
wîp sint sô maniger wunnen rîch.
Jâ waere ez wol, daz liebes vol
waer sîn gemuete, der ir guete
15 mit lob dicke tuot
lieplîch guot. jâ wol dien frouwen!
wan mac an in schouwen suezen schîn.
wan mac bî in wol froelîch sîn.
Sô stênt schôn ir tinne,
20 ir houbt, keln, nac, ir kinne,
ir brustel, ir ougen,
des man sol wol dar war gerne nemen.
Der welt krôn sint frouwen;
gar sueze ist ir anschouwen.
25 ir ist vil sô reine.
manc frouwe guot tuot daz swaz wol mac zemen.
Und waer ez nicht ein zuoversicht
doch sendes smerzen mannes herzen,
swanne er sicht sô gar
30 wunnevar die schoenen frouwen,
doch gît im daz schouwen hôhen muot,
swie wê doch sendez jâmer tuot.
Sît mannes muot wirt so gar guot,
swann er mac schouwen schoene frouwen,
35 sô wurd er êrst frô,
kaeme ez sô daz er etslîche
wîplîch wunnen rîche solt umbvân:
sô mochte er êrst recht froide hân!
Sî hânt lôs gebâren,
40 die reinen frouwen clâren,
gar lieplîch stêt ir kôsen;
dâ von wol wir ir doch noch mugen uns
frowen von schulden sêre.
Wen verdrôz ie frouwen,
der sî recht kond geschouwen?
45 der wart nie, sicherlîche,
des dunket mich: ich kan an in wol wizzn sô gar hôch êre.
Wie mochte ein man iemer verlân,
im kaem ze sinne rechtiu minne
bî frouwen sô fîn?
50 liechter schîn durgât sîn ougen
dâ sô lieplîch tougen: sô kumt er
in froide und doch in sende ger.
Ez ist klein nicht daz guot man siht
an schoenen wîben. ez kan trîben
55 leit wol von dem man,
der wol kan entstân ir guete:
sô wirt sîn gemuete froiden rîch.
wîp sint ze rechte minnenclîch.
Ir minnclîch lachen wunnesan
60 kan doch noch mangem wilden muot und sinne,
dâ bî minne sînem herzen bringen,
Ir wîplîch hende zartlîch wîz:
prîs ich gich wîbes bilden. manic gemuete
nâch ir guete muoz von schulden ringen.
65 Swenn ein schoen wîp ir schoenen lîp
sô schône treit und wol bekleit,
sô kumt sî dann sô gar
lieplîch clâr, sô wol ze prîse,
als ûz dem paradîse kom ir lîp.
70 ach wie sint sô guot schoeniu wîp!
Der wîp loen sint suez und lint.
swer der bevindet, der erwindet
an ir dienste nicht,
swiem geschicht, er muez dann sterben.
75 wan mac gerne werben umb diu wîp:
sî hânt sô minneclîchen lîp.
Ir wîplîch tanzen mannes muot
tuot sô frô, doch gar senelîche, der recht achtet
unde trachtet, wie lôslîch siz kunnen.
80 Minnenclîch stênt ir wîplîch kleit.
breit sol wol man ir wunne machen: mannes ougen
werdent tougen lieplîch vol ir wunnen.
Jâ mac der hân sô lieben wân,
der dik mac schouwen schoene frouwen,
85 wan er wirt dik sô
lieplîch frô, wan frouwen wunne
liuchtet sam der sunne. mannes lîp
froit nicht sô wol sô schoeniu wîp.
Secht doch, swer vil gedenken wil
90 nâch frouwen bilde, der wirt wilde,
wan er sicht wol noch
wunne doch an schoenen wîben.
daz wirz iemer trîben! frouwen fîn
muezen vor allen wunnen sîn
(3 votes, average: 3,67 out of 5)