Ursprinc bluomen, loup ûz dringen
Ursprinc bluomen, loup ûz dringen
und der luft des meigen urbort vogel ir alten dôn:
etswenn ich kan niuwez singen,
sô der rîfe ligt, guot wîp, noch allez ân dîn lôn.
die waltsinger und ir sanc
nâch halben sumers teile in niemens ôre enklanc.
Der bliclîchen bluomen glesten
sol des touwes anehanc erliutern, swâ si sint:
vogel die hellen und die besten,
al des meigen zît si wegent mit gesange ir kint.
dô slief niht diu nahtegal:
nu wache abr ich und singe ûf berge und in dem tal.
Mîn sanc wil genâde suochen
an dich, guetlich wîp: nu hilf, sît helfe ist worden nôt.
dîn lôn dienstes sol geruochen,
daz ich iemer biute und biute unz an mînen tôt.
lâz mich von dir nemen den trôst
daz ich ûz mînen langen klagen werde erlôst.
Werdez wîp, dîn suezin guete
und dîn minneclîcher zorn hât mir vil froide erwert.
maht du troesten mîn gemuete
wan ein helfelîchez wort von dir mich sanfice ernert.
mache wendic mir mîn klagen,
sô daz ich werde grôz gemuot bî mînen tagen.
(2 votes, average: 3,00 out of 5)