Si ist ze allen êren
Si ist ze allen êren ein wîp wol erkant,
schoener gebaerde, mit zuhten gemeit,
sô daz ir lop in dem rîche umbe get.
alse der mân wol verre uber lant
liuhtet des nahtes wol lieht unde breit,
sô daz sîn schîn al die welt umbevet,
Als ist mit guete umbevangen diu schône.
des man ir jêt,
si ist aller wîbe ein krône.
Diz lop beginnet vil vrouwen versmân,
daz ich die mîne vur alle andriu wîp
hân zeiner krône gesetzet sô hô,
unde ich der deheine ûz genomen hân.
des ist vil lûter vor valsche ir der lîp,
smal wol ze mâze, vil fier unde vrô.
Des muoz ich in ir genâden belîben,
gebiutet si sô,
mîn liebest vor allen wîben.
Got lâze sî mir vil lange gesunt,
die ich an wîplîcher staete noch ie vant,
sît si mîn lîp ze einer vrowen erkôs.
wol ir vil suezer — vil rôt ist ir der munt,
ir zene wîze ebene — verre bekant,
durch die ich gar alle unstaete verkôs,
Dô man si lobte als reine unde wîse,
senfte unde lôs;
dar umbe ich si noch prîse.
Ir tugent reine ist der sunnen gelîch,
diu truebiu wolken tuot liehte gevar,
swenne in dem meien ir schîn ist sô klâr.
des wirde ich staeter vroide vil rîch,
daz uberliuhtet ir lop alsô gar
wîp unde vrowen die besten vur wâr,
Die man benennet in tiuschem lande.
verre unde nâr
sô ist si ez, diu baz erkande.
(2 votes, average: 3,50 out of 5)