Sit si mir niht lonen wil
Sit si mir niht lonen wil
der ich han gesungen vil
seht so wil ich prisen
den der mir tuot sorgen rat.
herbest der des meien wat.
vellet von den risen.
ich weis wol es ist ein altes mære.
dc ein armes minnerlin ist reht ein martere.
seht zuo den was ich geweten.
wâffen die wil ich lan und wil ins luoder tretten.
Herbest under wint dich min.
wan ich wil din helfer sin.
gegen den glanzen meien.
durh dich mide ich sende not.
sit dir gebewin ist tot.
nim mich tumben leigen.
vúr in zeime steten ingesinde.
Steimar sich dc wil ich tuon swenne ich nu bas
bevinde.
ob du mich kanst gebrueven wol.
wafen ich singe das wir alle werden vol.
Herbest nu hoere an min leben.
wirt du solt uns vische geben.
me danne zehen hande.
gense huenr vogel swin.
dermel pfawen sunt da sin.
win von welschem lande
des gib uns vil und heisse uns schússel schochen.
koepfe und schússel wirt von mir untz an den grunt
erlochen.
wirt du la din sorgen sin.
wafen ioch muos ein rúwig herze troesten win.
Swc du uns gist dc wurze uns wol
bc dan man zemase sol.
dc in uns werde ein hitze.
dc gegen den trunke gange ein dunst.
als ein rǒch von einer brunst.
und dc der man er switze.
dc er wêne dc er vaste leke.
schaffe dc der munt uns als ein apoteke smeke.
er stumme ich von des wines kraft
wafen so gúz in mich, wirt durh geselleschaft.
Wirt durh mich ein strâze gat.
dar uf schaffe uns allen rat
manger hande spise.
wines der wol tribe ein rat.
hoeret uf der strâze pfat.
minen slunt ich prise.
mich wúrget niht ein grôssú gans so ichs slinde.
herbest trut geselle min noch nim mich zeingesinde.
min sêle uf eime rippe stat.
wafen dú von dem wîne dar uf gehúppet hat.
(2 votes, average: 5,00 out of 5)