The Garmont of Gud Ladeis
Wald my gud lady lufe me best
And wirk eftir my will,
I suld ane garmond gudliest
Gar mak hir body til.
Off he honour suld be hir hud,
Upoun hir heid to weir,
Garneist with govirnance so gud,
Na demyng suld hir deir.
Hir sark suld be hir body nixt
Of chestetie so quhyt,
With schame and dreid togidder mixt
The same suld be perfyt.
Hir kirtill suld be of clene constance,
Lasit with lesum lufe,
The mailyeis of continwance,
For nevir to remufe.
Hir gown suld be of gudlines,
Weill ribband with renowne,
Purfillit with plesour in ilk place,
Furrit with fyne fassoun.
Hir belt suld be of benignitie
Abowt hir middill meit,
Hir mantill of humilitie
To tholl bayth wind and weit.
Hir hat suld be of fair having,
And hir tepat of trewth,
Hir patelet of gud pansing
Hir hals ribbane of rewth.
Hir slevis suld be of esperance
To keip hir fra dispair,
Hir gluvis of gud govirnance
To hyd hir fynyearis fair.
Hir schone suld be of sickernes
In syne that scho nocht slyd,
Hir hois of honestie, I ges,
I suld for hir provyd.
Wald scho put on this garmond gay,
I durst sweir by my seill
That scho woir nevir grene nor gray
That set hir half so weill.
(3 votes, average: 5,00 out of 5)