Мудрагелістыя санэты

ПРАДМОВА

Сучасныя страшылкі. Modern Sagen.
Ад жаху валасы ўстаюць старчма.
Тут рэй вядуць Мярэсьеў і Карчагін.
Ты зь імі не сябруеш? А дарма!

Ты прагнеш вагін – мусіш мець “фальксваген”.
(Маркотнейшай аповесьці няма.)
Чым Брагін, лепш наведаць Капэнгаген,
хоць кажуць, што і Данія – турма.

Увесь сьвет – тэатар. Напачатку шатня.
Пасьля буфэт, грымерка… і вар’ятня,
дом творчасьці, дзе кожны – пацыент,

што трапіў на курорт амаль задарам
і дзень пры дні руплівым санітарам
дыктуе свой вялікі тастамэнт.

НЯЎЛОЎНЫЯ МСЬЦІЎЦЫ

Нам калыханкай сталіся здаўна
гарматны гул і куляметны строкат.
Мы часьцяком спыняліся за крок ад
сьмяротнай бліскавіцы й перуна.

Паслоў варожых пасылалі на…
Блукалі па балотах, жэрлі блекат,
пілі атруту й засыналі ўпокат –
і кожны абуджаўся давідна!

Бяз мараў пра хвалу і ўзнагароду
жыцьце аддаючы ў імя народу,
на вогнішча ішлі, як Жанна д’Арк.

Бо кожны з нас да звышгеройства звыклы,
і вораг часта бачыў нашы іклы,
заходзячы ў мясцовы заапарк.

НЕСЬМЯРОТНАСЬЦЬ

Мілосныя аблуды – у абладзе
юрлівых пацалункаў (балазе
ў кандытарскім дыхтоўным перакладзе
на мову саладжэнікаў – бэзэ).

Шампанскае і кельнэр-шымпанзэ,
а потым саксафоннае суладзьдзе
ў самотнай нараджаецца тузе
з брунатных вуснаў – сола ў шакалядзе.

І раптам – долу, каб разьбіцца ўшчэнт…
А ўнізе ўжо расьцягваецца тэнт
пажарнікамі, і сышлося мноства

пакліканых сустрэць адно цябе
амонімаў эгіпэцкага боства
ў касках на задумлівым ілбе.

(3 votes, average: 2,67 out of 5)